Integratión í Føroyum

Við oktober í 2019 vóru tað 1686 persónar búsitandi í Føroyum, ið komu úr londum uttanfyri Norðanlond. Hesi umboða heili 99 ymiskar tjóðir og eru av samlaða fólkatalinum í Føroyum 3,2 %. Filippsoyggjar, Rumenia, Pólland, Teiland, og Serbia eru tey fimm londini, ið eru best umboðaði í Føroyum.

Tilflytarar, ið flyta til landið, festa fyri tað mesta búgv í longri tíð. Sum nýkomin til landið hevur mann møguleika at læra føroyskt í kvøldskúlanum.

Tað eru í løtuni nøkur afturvendandi integratiónstiltøk, ið eru á skránni gjøgnum árið. Sambinding/Intertwining er úrslit av samstarvi millum Reyða Kross og einstøk bókasøvn, hetta er eitt tiltak har tilflytarar og onnur í økinum kunnu hittast. Tórshavnar kommuna skipar fyri Diversity, ið fagnar ymiskum mentanunum í býnum. Og í Klaksvíkar kommunu verður skipað fyri einum tiltaki við einum líknandi endamáli, við heitinum International Day. 

Integratiónsmál er málsøki hjá Uttanríkis- og vinnumálaráðnum. Í novembur 2015 var integratiónssamskipari settur í starv á Útlendingastovuni. Útlendingastovan samskipar og virkar fyri integratiónsátøkum, sum hava við undirvísing í føroyskum máli, arbeiðsmarknað og vælferðartænastur, umframt hetta, so samstarvar stovnurin við aðrar stovnar og myndugleikar kring landið.

  • Ráðgeving og samstarv við almennar stovnar, felagsskapir og onnur innan integratión
  • Samstarv og samskipan við kommunurnar
  • Fáa til vega tilfar og upplýsingar til nýkomin til Føroya
  • Vera við í lógarfyrireikandi arbeiði