Vegleiðing til kommunur og integratiónssamskiparar
Fyrsta føroyska integratiónslógin kom í gildi 1. juli 2025. Lógin hevur til endamáls at styrkja integratiónina av tilflytarum í Føroyum og at greiða frá ábyrgd, skyldum og samstarvi millum myndugleikar.
Kommunurnar hava ein týdningarmiklan leiklut í hesum arbeiðinum. Tær eru ofta fyrsta almenna sambandið hjá fólki, sum flyta til Føroya, og nógv av integratiónini fer fram lokalt – í dagstovnum, skúlum, frítíðarlívi og í dagliga samskiftinum við kommununa.
Hjá nógvum kommunum er integratión eitt nýtt arbeiðsøki. Integratiónslógin merkir tó ikki, at kommunurnar skulu loysa allar avbjóðingar hjá tilflytarum. Endamálið er heldur at skapa góðar karmar fyri móttøku, vegleiðing og luttøku í lokalsamfelagnum.
Henda vegleiðingin er ætlað sum eitt praktiskt amboð til kommunur og integratiónssamskiparar. Hon greiðir frá:
- hvørjar skyldur kommunurnar hava sambært integratiónslógini
- hvør leikluturin hjá integratiónssamskiparanum er
- hvussu kommunur kunnu arbeiða við integratión í praksis
- nær tað er viðkomandi at samstarva við aðrar myndugleikar og fakfólk