Tíðindi

Byrjað var kl. 17 við tailendskum mati: glasnudlum við høsnarunga, rísi og varrullum. Síðan var møguleiki at keypa sær kaffi og kaku frá næmingum í 6. og 7. flokki.

Á skránni var eisini ein Kahootkapping. Ida Bjørg Hansen gjørdist hepni vinnarin av kappingini.

Næmingar og lærarar á skúlanum á Fossánesi hava vikuna fram til tiltakið havt eina tailendska evnisviku, har tey hava gjørt plansjur um bæði tailendskan mat, djór, átrúnað, fruktir o.s.fr. Eisini hava tey evnað, teknað og málað ymiskt, millum annað ein stóran fíl.

Í Barnahúsinum Imba høvdu børn og starvsfólk eisini gjørt burtur úr við at klippa, líma plansjur. Alt hetta var at síggja í framsýningarrúminum, sum var opið á tiltakinum.

Børn og vaksin gjørdu eisini brúk av verkstovu, sum næmingarnir høvdu lagt til rættis, har møguleiki var at tekna og perla ymiskt tailendskt.

Tiltakið var eitt samstarv millum tær tailendsku kvinnurnar í kommununi, kommununa, skúlan og dagstovnin.